1Ch 26 | NdeIBE | STEP | Izigaba zabalindi bamasango: KwabakoKhora: kunguMeshelemiya indodana ka-Khore, omunye wamadodana ka-Asafi.

1 Chronicles 26

Abalindi BamaSango

1 Izigaba zabalindi bamasango: KwabakoKhora: kunguMeshelemiya indodana ka-Khore, omunye wamadodana ka-Asafi.

2 UMeshelemiya wayelamadodana ahlanganisa uZekhariya eyakuqala loJedayeli eyesibili, loZebhadiya eyesithathu, loJathiniyeli eyesine,

3 lo-Elamu eyesihlanu, loJehohanani eyesithupha kanye lo-Eliyehonayi eyesikhombisa.

4 U-Obhedi-Edomi laye wayelamadodana: kunguShemayiya eyakuqala, loJehozabhadi eyesibili, loJowa eyesithathu, loSakhari eyesine, loNethaneli eyesihlanu,

5 lo-Amiyeli eyesithupha, lo-Isakhari eyesikhombisa, kanye loPhewulethayi eyesificamibili. (Ngoba uNkulunkulu wayembusisile u-Obhedi-Edomi.)

6 Indodana yakhe uShemayiya layo yayilamadodana, ayengabakhokheli kwabendlu kayise ngoba babengamadoda enelisayo.

7 Amadodana kaShemayiya wona yila: ngu-Othini, loRafayeli, lo-Obhedi kanye lo-Elizabhadi; izihlobo zakhe u-Elihu loSemakhiya lazo zazingamadoda ayesenelisa.

8 Bonke laba babengabosendo luka-Obhedi-Edomi; bona kanye lamadodana abo lezihlobo zabo babengamadoda enelisayo belamandla okwenza umsebenzi – bengabosendo luka-Obhedi-Edomi, bengamatshumi ayisithupha labantu ababili sebendawonye.

9 UMeshelemiya wayelamadodana lezihlobo, amadoda ayekhaliphile elitshumi laficamibili esendawonye.

10 UHosa ongumMerari wayelamadodana: uShimiri engowakuqala (loba wayengasuye izibulo, uyise wayembeke kulesosikhundla sokuba ngowokuqala),

11 loHilikhiya engowesibili, loThabhaliya engowesithathu kanye loZekhariya engowesine. Amadodana lezihlobo zikaHosa sebendawonye babelitshumi labantu abathathu.

12 Izigaba zabalindi bamasango, kusiya ngabakhokheli bazo, zazilomlandu wokwenza umsebenzi ethempelini likaJehova, njengokwakusenziwa yizihlobo zabo. 13 Benza inkatho isango lilinye, kusiya ngemuli, abatsha labadala kufanana.

14 Izopho leSango leMpumalanga laya kuShelemiya. Basebesenzela inkatho indodana yakhe uZekhariya owayengumcebisi okhaliphileyo, inkatho yasimnika izopho leSango leNyakatho. 15 Inkatho yathi izopho leSango langeZansi liya ku-Obhedi-Edomi, kwathi izopho lokulinda iziphala laya kumadodana akhe. 16 Izopho leSango leNtshonalanga kanye leSango leShalekhethi emgwaqweni ongaphezulu laya kuShuphimi loHosa. Kwalinda abalindi ngabalindi:

17 Kwakusiba labaLevi abayisithupha ngelanga empumalanga, abane ngelanga enyakatho, abane ezansi ngelanga kuyekuthi esiphaleni kube lababili lakhona ngazo zonke izikhathi. 18 Phambili ngentshonalanga, kwakulabane emgwaqweni, ababili besegumeni uqobo.

19 Lezi yizigaba zabalindi bamasango ababengabosendo lukaKhora loMerari.

Abagcinisikhwama Lezinye Izikhulu

20 Abanye babaLevi babephatha inotho yethempeli likaNkulunkulu leziligugu ezingcwele.

21 Abosendo lukaLadani, ababe ngama-Geshoni ngoLadani njalo ababeyizinhloko zabakaLadani umGeshoni, kwakungu-Jehiyeli,

22 amadodana kaJehiyeli, loZethami lomfowabo uJoweli. Laba yibo ababephethe inotho yethempeli likaJehova.

23 Kuma-Amramu, ama-Izihari, lama-Hebhroni lama-Uziyeli babemi ngalindlela:

24 UShubayeli, owosendo lukaGeshomi indodana kaMosi, wayeyisikhulu esasiphethe ezenotho. 25 Izihlobo zakhe ngo-Eliyezeri yilezi: nguRehabhiya indodana yakhe, loJeshaya indodana yakhe, loJoramu indodana yakhe, loZikhiri indodana yakhe loShelomithi indodana yakhe. 26 UShelomithi lezihlobo zakhe babephethe zonke ezenotho ezingcwele ezazinikelwe yinkosi uDavida, labayizinhloko zezindlu ababengabalawuli bezinkulungwane labalawuli bamakhulu, langabanye abalawuli bamabutho.

27 Eyinye impango eyayithunjwe ekulweni bayinikela ekulungisweni kwethempeli likaJehova. 28 Lakho konke okwakunikelwe nguSamuyeli umboni loSawuli indodana kaKhishi, lo-Abhineri indodana kaNeri loJowabi indodana kaZeruya, lazo zonke ezinye ezazinikelwe zazisesandleni sikaShelomithi kanye lezihlobo zakhe.

29 Kwabaka-Izihari yilaba: UKhenaniya lamadodana akhe baphiwa umsebenzi ngaphandle kwethempeli, beyizikhulu labehluleli kwabako-Israyeli.

30 KwabakaHebhroni yilaba: UHashabhiya lezihlobo zakhe, amadoda enelisayo ayengamakhulu alitshumi layisikhombisa – ayekhangele ingxenye ka-Israyeli entshonalanga yeJodani kuwo wonke umsebenzi kaJehova lokuba yizinceku zenkosi. 31 AmaHebhroni wona, umkhokheli wawo kwakunguJeriya kusiya ngokulotshwa koluhlu lokuzalana kwezimuli zawo. Kwathi ngomnyaka wamatshumi amane wokubusa kuka-Davida kwahlolisiswa kuloluluhlu lwemibhalo, kwafunyanwa ukuthi amadoda akhaliphileyo phakathi kwamaHebhroni ayeseJazeri ngase-Gileyadi. 32 UJeriya wayelezihlobo ezingamakhulu angamatshumi amabili lesikhombisa, ezazikhaliphile njalo ziyizinhloko zezimuli zazo, ngakho inkosi uDavida wazibeka ukuthi ziphathe abakoRubheni, abakoGadi lengxenye yesizwana sikaManase kukho konke okwakungokukaNkulunkulu lokuyizindaba zenkosi.